REUNIÓN DO CLUB DE LECTURA (XANEIRO)


1º CICLO ESO

 

EL ASESINATO DE LA PROFESORA DE LENGUA, Jordi Sierra i Fabra

ACTIVIDADES 

Amais dos comentarios e análises sobre o contido do libro, o alumnado presente nesta reunión do club de lectura tamén realizou as seguintes actividades:

• ORDENAR CRONOLOXICAMENTE

O alumnado ten que ordenar cronoloxicamente dez fragmentos desordenados que se corresponden con outras tantas partes da novela lida.

• SOPA DE LETRAS

Nesta sopa de letras hai que localizar o nome de dezaseis autores/as de obras que figuran nos títulos de cada un dos capítulos de El asesinato de la profesora de lengua.

• RELACIONAR

Nesta actividade hai que relacionar títulos de obras da literatura universal citados na novela de Jordi Sierra i Fabra co autor das mesmas. 

OPINAMOS

O libro gustoume moito, paréceme moi entretido. Aos rapaces e rapazas que teñan máis de 12 anos, recoméndolles esta lectura porque aprendes moitas cousas relacionadas coa literatura dunha forma divertida.

Christian Fernández

Gustoume o libro d’El asesinato de la profesora de lengua porque é entretido e fácil de ler. Aos mozos e mozas que lles guste ler seguro que lles vai encantar esta novela.

En xeral, gustáronme todos os personaxes, pero o de Soledad pareceume especialmente interesante polo enfado que ten cos seus alumnos e polas probas ás que os somete.

Álvaro Fernández Lorido

O libro El asesinato de la profesora de lengua pareceume moi interesante. A historia que conta faite reflexionar sobre a actitude negativa dos alumnos sobre algunha materia e de como se pode cambiar iso.

Recomendaríalle este libro a todos os rapaces e rapazas que lles guste ler.

Ilyasse Lefsahi

REUNIÓN DO CLUB DE LECTURA (XANEIRO)


2º CICLO ESO:

REBELDES, Susan E. Hinton





  
ACTIVIDADES:
 

Ademais dos comentarios e análises sobre o contido do libro, durante a reunión do club de lectura o alumnado participante tamén realizou as seguintes actividades:

• MARCAR A OPCIÓN CORRECTA

O alumnado ten que elixir unha resposta correcta entre tres opcións posibles. As trinta e unha preguntas desta actividade teñen que ver co contido da lectura realizada polos discentes para este mes de xaneiro.

• ORDENAR DE FORMA CRONOLÓXICA

Nesta actividade o alumnado ten que ordenar de forma cronolóxica trece parágrafos da novela Rebeldes.

OPINAMOS

Este libro gustoume moito por como se trata o delicado tema das clases sociais e a marxinación. É unha historia tenra e violenta ao mesmo tempo. Gocei moito con todos os personaxes, pero especialmente con Ponyboy, porque me sinto identificada con el, xa que aos dous nos gusta ler e, ademais, eu tamén sei o que significa ser a máis pequena da familia. Darry foi outro dos personaxes que me gustou. Paréceme importante o seu papel de irmán maior que ten que exercer de pai. Isto coido que ten que ser moi complicado para un rapaz tan novo coma el, aínda que sexa unha persoa moi madura. Outro personaxe interesante é Dally, que semella ser frío, maleducado e indiferente para esconder a dor que sente ao estar só. Ao ler este libro notei a fraternidade existente entre eles, porque todos se sentían un pouco sós. Non me importaría que actualizasen este libro. En xeral gustoume moito.

Ana María  Gómez Sánchez

O libro Rebeldes gustoume moito porque describe ben os personaxes e os lugares nos que se desenvolve a acción. Mantense a intriga ao longo das súas páxinas, o que fai que a medida que avanzamos na lectura queiramos saber máis cousas da historia. O que menos me gustou foi o final da historia, gustaríame que pasasen máis cousas antes do remate.

Mohamed Lefsahi

O que máis me gustou de Rebeldes foi o momento no que Jhonny mata a Bob, porque a partir deste intre os sucesos que pasan obrígante a que sigas lendo.

O personaxe co que máis me identifiquei foi Ponyboy, pola súa forma de ser e de actuar nos momentos máis críticos.

Recomendo a lectura deste libro. A min, ao principio, pensaba que non me ía gustar, pero unha vez que empecei a ler descubrín que as persoas poden vivir a súa vida dende diferentes puntos de vista. Por iso creo que todos os adolescentes deberían ler esta novela.

David Pérez López

RELATOS CONTRA A VIOLENCIA DE XÉNERO

CINEMA E LITERATURA

Como o alumnado de 2º ciclo da ESO ten que ler para o mes de xaneiro a novela de Susan E. Hinton titulada Rebeldes, imos aproveitar para ver a película baseada na obra desta autora, dirixida por Francis Ford Coppola.

Francis Ford Coppola

Ponyboy Curtis é un adolescente orfo que pertence á banda dos Graxentos. Os seus dous irmáns e todos os seus amigos forman parte da banda. Controlan o seu territorio e á banda rival, os Dandis. Unha noite, como resultado dunha pelexa, un dos Dandis morre acoitelado. Ponyboy e o seu amigo Johnny deciden fuxir.

Aquí tedes a película completa

CINEMA E VIOLENCIA DE XÉNERO

Entre as diversas actividades que se están a realizar no centro con motivo do Día Internacional contra a Violencia de Xénero, imos ver neste mes de decembro unha película que trata esta problemática. A elección non foi fácil, xa que houbo que buscar unha que non violentase a sensibilidade dos rapaces e rapazas -estamos a falar de xente menor de dezaseis anos-. De todas as opcións, cremos que un dos filmes que mellor explica a praga que están a padecer moitas mulleres é o que dirixiu Icíar Bollaín o ano 2003 e que leva por título Te doy mis ojos.

Icíar Bollaín

Pilar foxe en plena noite da súa casa, situada nun barrio periférico e residencial de Toledo; leva consigo o seu fillo duns oito anos. Na súa fuxida busca refuxio na casa da súa irmá, unha restauradora de arte que leva unha vida independente ao lado da súa parella escocesa, ambos os dous residen na parte vella e histórica de Toledo.

Pilar é unha vítima máis dos malos tratos conxugais, que intenta refacer a súa vida e empeza a traballar como caixeira de visitas turísticas na igrexa que alberga o cadro El entierro del Conde de Orgaz. A través do seu novo traballo comeza a relacionarse con outras mulleres. Antonio, o seu marido, emprende a súa busca e a súa recuperación, promete cambiar e busca axuda nun psicólogo. Pilar dálle outra oportunidade, coa oposición da súa irmá, que é incapaz de entender a súa actitude.

A pesar dos esforzos de Antonio por seguir os consellos da terapia, a súa personalidade violenta e inseguridades pódenlle e remata espindo e humillando publicamente nun balcón a súa muller.

A película remata cun final aberto no que Piar, escoltada polas súas compañeiras de traballo, recolle as súas cousas do domicilio para emprender unha nova vida, mentres Antonio mira pensativo.

LECTURAS PARA XANEIRO:

 1º CICLO ESO:


EL ASESINATO DE LA PROFESORA DE LENGUA 

Jordi Sierra i Fabra

Soledad, a profesora de lingua, está farta de que os seus alumnos non se esforcen na clase. A súa desesperación chegou ao límite, e dálles unha importante noticia: antes de rematar o día, asasinará a un deles, se non a conseguen deter antes. Gaspar e Tasio, coa axuda de Ana, Matilde e Xulio conseguirano, descifrando toda clase de enigmas.

Neste libro ti tamén poderás descifrar moitas adiviñas e enigmas.

 2º CICLO ESO:

REBELDES - Susan E. Hinton

As pelexas na rúa entre bandas rivais desencadean tal violencia, que moitas rematan de forma tráxica. Os conflitos familiares, a marxinación, a ausencia de futuro... levan algúns mozos a buscar na rúa e no grupo o que non encontran na casa. Pero sempre queda un fulgor de esperanza. Francis Ford Coppola levou ao cine esta novela que describe a dura realidade na que se moven os adolescentes nos suburbios das grandes cidades.







Podedes ver a película completa premendo aquí

MICRORRELATOS DE TERROR